مسرح العبث 2 ...بقية

الفصل الثالث

لم اكن انوي اكمال التدوينة السابقة لكن نعمل ايه ما باليد حيلة ...

يقول عمنا يوسف بك وهبي ما الدنيا الا مسرح كبير ...احنا طبعا الممثلين ولكل منا دوره ..حين يأتي هذا الدور تصعد علي خشبة المسرح تؤدي دورك ثم تنتظر التصفيق من الجمهور او القذف بثمرات الطماطم والبيض...لكن من هو الجمهور ..انه نحن ايضا ...يعني عندما تنتهي من دورك تترك المسرح لممثل اخر وتجلس مع الجماهير ..غريبة مش كده ...هكذا هو مسرح العبث... والان ..دعونا نرتب افكارنا ونوسع الدائرة ...

اليوم اقدم لكم الفصل الثالث من المسرحية العبثية التي لا عنوان لها والتي تدور علي خشبة مسرح المحروسة 

عناوين الاخبار :

الجبلي :نتوقع موجة ثانية أشد لانفلونزا الخنازير 

الله يبشره بالخير دايما كده تصريحاته تفتح النفس من يومين كان هناك عنوانا اخر 

وفاة 8 بانفلونزا الخنازير والجبلي يصرح المرض تحت السيطرة

مجرد رؤيته في الصحف او علي شاشات التلفزيون تصيبني بحالة من الهرش وارتفاع ضغط الدم مع هبوط حاد يعقبه صراخ مستمر قلبي قلبي الحقووووووني 

هو دائما هادئا رائق البال- مش عارف جاب الهدوء ده منين- يخبطنا كل تصريح واللي قبله حاجة كده تسد النفس ...8 حالات والمرض تحت السيطرة يا سلام علي الحلاوة ربنا يستر علينا ...هيجي يوم نقرا في الجرايد لم يبقي في مصر سوي 50 شخصا فقط ومررنا بسلام من طور الجائحة والجبلي يصرح مصر اكثر الدول استعدادا للمرض ....طيب سيبك من الانفلونزا بلاش كلام عنها خالص شوف بقي الكلمتين اللي جايين دول , من جهة اخري قال الجبلي :" نحن نقف علي اعتاب قانون رائد للتأمين الصحي والاجتماعي الشامل" الشامل واخد بالك انت كمل بس ...

مضيفا ان الوزارة تبنت مشروع قانون يضمن تغطية تأمينية لجميع المواطنين عن طريق نظام اشتراك يتناسب مع دخل المشترك والتزام الحكومة بتغطية قيمة اشتراكات غير القادرين ...حد فاهم حاجة...طيب يعني ايه بقي الكلام ده...معناه تطبيق نظام التأمين الصحي الرأسمالي القائم تحديدا في امريكا ..حد شاف مسلسل "er" ..المعني ان كل واحد هيدفع اشتراك يتم تسديده بصورة شهرية او سنوية حسب الاتفاق عن طريق اما الخصم من المرتب في الحكومة او بعض شركات القطاع الخاص او عمل بوليصة تأمينية علي الصحة يقوم صاحبها بتسديد اقساط البوليصة بصورة دورية واي تاخير في السداد سيحرم صاحبه من العلاج بل سيتم علاجه علي نفقته الخاصة ...نرجع لمسلسل "er" في احد الحلقات دخلت احدي الحالات الحرجة الي قسم الطوارئ تعاني من ازمة قلبية بعد انعاش الحالة رفضت ادارة المستشفي انزال المريض في حجرة العناية المركزة بسبب ان :"his insurance licence is invalidated" يعني تصريح التأمين بتاعه انتهي وعليه التجديد بدفع المبالغ المستحقة عليه للتأمين الصحي ...يعني العلاج هيبقي بفلوس جدعان يعني موتوا وريحونا بقي...,ويقولك الحكومة سوف تتعهد بغير القادرين ده عند ام مشمش 

الباقي ...كما لفت الوزير الي اعداد دراسة اكتوارية خاصة لتحديد تكلفة المشروع وضمان استدامة تمويله ....يمسيك بالخير يا مكي ...حد يترجملي بيقول ايه الواد ده ..يعني ايه بقي لامؤاخذه اكتوارية دي انا بصراحه اول مرة اشوف الكلمة دي في حياتي 

طيب انا بقي عندي حل لسيادة الوزير بلا اكتوارية بلا بدنجان احنا ننتحر انتحار جماعي علشان يخلص سيادته مننا ويشوف حد غيرنا يتوزر عليه ويا دار ما دخلك شر ...غريب امر حكومتنا كل من فيها يعتقدون ان العيب في الشعب هو الذي لا يعرف كيف يعيش ولا كيف يمرض ولا كيف يركب القطار ويحترق فيه صامتا ...والمصري اللي علي حق يقول للغلط A7A .....

ع الجدار...ع الجدار الفرخة بايضة ع الجدار والديك قاطرها ع الجدار

مكرم محمد احمد يفوز للمرة الثانية علي التوالي بمقعد رئيس نقابة الصحفيين وانصاره يرفعون شعارات "الكبير كبير ...مش عايزين تغيير"
مش عارف ليه عمرو مصطفي سكت علي موضوع الكبير كبير ده ..ناس معندهاش ضمير كده السرقة عيني عينك ..

استقرار حالة ضحية اللودر ووالدها يستخرج لها جواز سفر تحسبا لعلاجها بالخارج
طفلة صغيرة تدعي مريم تم هدم بيتها علي رأسها دون سابق انذار ...الحكومة تقضي بحبس سائق اللودر ...البيت جاله قرار ازالة وراحوا علشان ينفذوا هوب طربقوا البيت علي دماغ البنت الصغيرة وهي مش حاسة وهما ولا هما هنا 
هذا الحادث اثبت بالدليل القاطع الذي لا يدع مجالا للشك ان الاسرائليين الذين يهدمون البيوت علي رؤوس الفلسطينين كل يوم اكثر منا رحمة علي الاقل هم يطلقون الابواق محذرين اصحاب البيت بالخروج فورا والا دكوا البيت علي رأس اصحابه ثم ينتظروا حتي يتأكدوا ان اخر واحد في البيت قد غادره وانه خالي تماما ثم تبدأ عملية الهدم لكن لا سائق اللودر ولا رجال الحي البواسل كلفوا انفسهم عناء التفكير في تواجد احد بالداخل ام لا وطبعا سوف يتم تقديم سائق اللودر ككبش فداء لاصحاب الياقات البيضاء اعضاء المجلس المحلي ورؤساء الاحياء المرتشيين 
 سعر كيلو السكر وصل ل 5 جنيهات في المجمعات الاستهلاكية 
رحم الله المطرب سيد الملاح : البقال قال اشتروا سكر ...املوا جيبكم كلها سكر ...احسن شئ في الدنيا السكر حتي اسالوا ابريق الشاي ..انا انا ابريق الشاي 
كفاية بصراحه النهاردة الواحد خلاص ضغطه خبط في السقف ...تصبح علي خير

.................. 

كلمات راقصة

شعر : يا ترسملونا يا تمركسونا ....يلعن ابوكم علي ابونا

الحب : هو خطيئة ادم الاولي والتي اخرجته من الجنة ..تاب عنها ولكنها تركت له عظمة بارزة تحت جلد رقبته وفي حناجر ابنائه (تفاحة ادم )

الندم : يأتي نتيجة فعلك لشئ تخطيت به كل الحدود وكسرت به القيود التي تربطك الي الارض...

الامل : هو مخدر ينتهي مفعوله مع انتهاء حياتك

مراحل : الرجل ...من سن السابعة وحتي الرابعة عشرة صبيا ...ومن سن الرابعة عشرة وحتي الواحد والعشرين مراهقا ...ومن سن الواحد والعشرين وحتي سن الاربعين شابا ..وبعد الاربعين يصبح شيخا ...

المرأة ...من سن السابعة وحتي الرابعة عشرة صبية ...ومن سن الرابعة عشرة وحتي الواحد والعشرين مراهقة ....ومن سن الواحد والعشرين وحتي الاربعين سيدة شابة وبعد الاربعين تظل سيدة شابة الي ان تصل الي القبر وهي تعتقد انها سيدة شابة

وصية محب : اذا مت ادفنوني الي جوار ال البيت واكتبوا علي قبري "وكلبهم باسط ذراعيه بالوصيد .." ...دعبل الخزاعي